AIDA mirëpret përfaqësues të Deloitte Germany për të diskutuar mbi një investim të mundshëm në sektorin SSC në Shqipëri

Në kuadër të mbështetjes për nxitjen e investimeve të huaja në Shqipëri, AIDA mirëpriti përfaqësues të Deloitte Germany: znj. Ana Gombovic & z. Hans-Christian Busch, konsulentë strategjik në fushën e Real Estate & Transformation.

Qëllimi i vizitës lidhej me asistimin e një klienti potencial gjerman, i cili ka shprehur interes për të investuar në sektorin e Qendrave të Shërbimeve të Përbashkëta (SSC) në Shqipëri.

Në rolin e saj si një “one-stop-shop” për investitorët, AIDA organizoi dhe ndërmjetësoi një sërë takimesh me bashkëpunëtorë të mundshëm që mund të kontribuojnë në realizimin e këtij projekti.

Të pranishëm në takim ishin:

• Znj. Florenca Haxhi, CEO e Durana Techno Park, e cila prezantoi në detaje projektin që pritet të zbatohet, duke përfshirë incentivat fiskale, përfitimet financiare dhe lehtësitë administrative që u ofrohen kompanive të teknologjisë së informacionit dhe nomadëve digjitalë.

• Znj. Elona Poga, përfaqësuese e Shoqatës ABSL, e cila theksoi rëndësinë e programeve për edukimin dhe trajnimin e talenteve të rinj në fushën e shërbimeve të biznesit dhe teknologjisë.

• Rekrutues të tregut vendas, të cilët ndanë ekspertizën e tyre mbi veçoritë e tregut të punës në Shqipëri.

• Znj. Elona Ymeri, përfaqësuese e kompanisë Assist Digital, e cila ndau eksperiencën e kësaj kompanie në sektorin konsulencë dhe teknologji dixhitale në Shqipëri që prej vitit 2016.

Tryeza e rrumbullakët e takimet e zhvilluara shërbyen për të adresuar shumë nga pyetjet dhe interesat e përfaqësuesve të Deloitte, jo vetëm në lidhje me sektorin e IT-së, por edhe me tregun e punës, disponueshmërinë e fuqisë punëtore, kërkesën në rritje dhe perspektivën e përgjithshme që ofron Shqipëria në fushën e ICT/BPO dhe SSC.