Gjatë vitit 2025, AIDA organizoi dy fushata outreach për tërheqjen e investimeve të huaja, të fokusuara në sektorët ICT/BPO dhe manifakturën e pajisjeve mjekësore.
· Në kuadër të fushatës outreach në sektorin ICT/BPO, AIDA, në bashkëpunim me ABSL Albania, zhvilloi një takim me përfaqësuesin e kompanisë Secitops, me qëllim eksplorimin e interesit për investim në Shqipëri në fushën e fintech, financës digjitale dhe shërbimeve të biznesit.
Gjatë diskutimeve, kompania prezantoi interesin për krijimin e një platforme digjitale dhe hapjen e një banke online, të fokusuar në transfertat ndërkombëtare të parave dhe ofrimin e shërbimeve financiare për sektorin ICT dhe outsourcing, duke e konsideruar Shqipërinë si një treg potencial për zgjerim të operacioneve të saj. Gjatë takimit, AIDA prezantoi potencialin e Shqipërisë si destinacion konkurrues për investime në ICT/BPO, duke vënë në pah fuqinë punëtore të kualifikuar, kostot konkurruese, si dhe pozicionin strategjik të vendit në raport me tregjet e Bashkimit Evropian. Në vijim, AIDA do të mbajë komunikim të vazhdueshëm me kompaninë dhe do të koordinohet me institucionet përkatëse financiare dhe rregullatore për të vlerësuar më tej realizueshmërinë dhe hapat konkretë për zhvillimin e këtij projekti në Shqipëri.
· Fushata e dytë, me fokus manifakturën e pajisjeve mjekësore, u organizua me mbështetjen e Regional Cooperation Council (RCC) dhe u zhvillua në Düsseldorf, më 16–17 nëntor 2025, në kuadër të panairit ndërkombëtar MEDICA/COMPAMED 2025.
Pjesëmarrja në këtë panair krijoi mundësinë të ndërveprojmë drejtpërdrejt me kompani të fushës, të prezantojmë potencialin e Shqipërisë dhe të forcojmë pozicionimin tonë si destinacion i favorshëm për investime në këtë industri në rritje. Gjatë dy ditëve të takimit, u zhvilluan rreth 15 takime. Gjatë takimeve, u vu re fakti se një numër i konsiderueshëm kompanish tashmë kanë partneritete me kompani që operojnë në Shqipëri, çka paraqet një mundësi reale për të çuar më tej marrëdhëniet ekzistuese dhe për të ndërtuar bazën për investime të reja direkte.
Në të dyja ditët e fushatës, AIDA pati mundësinë të përçojë një mesazh të qartë dhe të strukturuar mbi përparësitë që ofron vendi ynë për investitorët e huaj: stabilitetin makroekonomik, një klimë të favorshme biznesi, kostot konkurruese, akses të shpejtë drejt tregjeve të BE-së dhe rajonit, si dhe përqendrimin në zhvillimin e sektorëve me vlerë të shtuar.
Fushata outreach u përmbyll me sukses, duke konsoliduar kontakte të rëndësishme dhe duke rritur interesin për Shqipërinë si një destinacion konkurrues për investime në sektorin e prodhimit të pajisjeve mjekësore. AIDA nisi një proces të strukturuar follow-up-i me të gjitha kompanitë e takuara. Gjatë muajit dhjetor u organizuan dy takime online me kompanitë Barkeley Health dhe Moslab.
