Një shtetas i huaj që synon të qëndrojë dhe të ushtrojë aktivitet ekonomik në territorin e Republikës së Shqipërisë, është i detyruar të pajiset me leje qëndrimi dhe në varësi të rastit, me leje pune. Në përputhje me kuadrin ligjor në fuqi, autoritetet shqiptare ofrojnë mundësinë e aplikimit për një Leje Unike, e cila përfshin të drejtën për qëndrim dhe ushtrim të veprimtarisë së punësimit në një dokument të vetëm. Procedura realizohet në mënyrë tërësisht elektronike përmes platformës shtetërore e-Albania, si dhe në bashkëpunim me institucionet përgjegjëse për punësimin dhe çështjet e migracionit.

Për qëllime punësimi, ligji parashikon pajisjen me një leje unike (leje qëndrimi dhe leje pune në një dokument të vetëm) sipas kategorive të mëposhtme:

i. leje unike si punëmarrës;

ii. leje unike për punësim stinor;

iii. leje unike për të transferuar brenda ndërmarrjes;

iv. leje unike si punëtor ndërkufitar;

v. leje unike për formim profesional;

vi. leje unike për sportistë;

vii. leje unike për shërbim vullnetar;

viii. leje unike për punonjës me kualifikim të lartë;

ix. leje unike për persona të vetëpunësuar;

x. leje unike për punonjës lëvizës digjital;

xi. leje unike për investitorë;

xii. leje unike për shërbime kontraktuese;

xiii. leje unike për kategori të veçanta.

Kërkesa për një leje unike qëndrimi për një të huaj mund të bëhet nga vetë i huaji, me qëndrim të ligjshëm në Republikën e Shqipërisë.