Partneritet i Ri midis AIDA dhe HEPA për Zhvillim Ekonomik
Partneritet i Ri midis AIDA dhe HEPA për Zhvillim Ekonomik
Agjencia Shqiptare e Zhvillimit të Investimeve (AIDA) dhe Agjencia Hungareze e Promovimit të Eksporteve (HEPA) kanë nënshkruar një Memorandum Mirëkuptimi për të forcuar bashkëpunimin në zhvillimin ekonomik dhe promovimin e investimeve. Marrëveshja, e nënshkruar nga Laura Saro, Drejtore Ekzekutive e AIDA-s, dhe Andrea Nestor, Zv. Drejtore e HEPA-s, synon përmirësimin e marrëdhënieve ekonomike dhe shkëmbimin e eksperiencave mes dy vendeve.
Ky bashkëpunim do të mbështesë zhvillimin e bizneseve të vogla dhe të mesme, duke përfshirë kalimin në modele më të gjelbra dhe digjitale. Gjithashtu, marrëveshja përfshin ndihmë në mobilizimin e burimeve financiare, ndërtimin e kapaciteteve dhe organizimin e ngjarjeve ekonomike dhe promovuese.
Palët do të punojnë për të identifikuar mundësitë e financimit ndërkombëtar dhe organizimin e ngjarjeve B2B për të mbështetur bizneset në sektorët e interesit të përbashkët. Kjo marrëveshje është një hap thelbësor në forcimin e lidhjeve ekonomike dhe promovimin e zhvillimit të qëndrueshëm në Shqipëri dhe Hungari.
