“Investor Support Days 2025”, AIDA, në bashkëpunim me Dhomën Britanike të Tregtisë në Shqipëri (BCCA), organizoi “Ditën e Investitorëve të Mbretërisë së Bashkuar”
Në kuadër të nismës “Investor Support Days 2025”, AIDA, në bashkëpunim me Dhomën Britanike të Tregtisë në Shqipëri (BCCA), organizoi “Ditën e Investitorëve të Mbretërisë së Bashkuar”, një takim i dedikuar forcimit të dialogut me bizneset britanike që operojnë në Shqipëri.
Në aktivitet morën pjesë Zv. Ambasadorja e Britanisë në Shqipëri, znj. Julia Sutherland, Zv. Ministri i Ekonomisë dhe Inovacionit, z. Enkelejd Musabelliu, si dhe përfaqësues të institucioneve shtetërore.
Diskutimet u përqendruan në mundësitë për zgjerimin e bashkëpunimit ekonomik ndërmjet Shqipërisë dhe Mbretërisë së Bashkuar, si dhe në identifikimin e sfidave që hasin investitorët britanikë në tregun vendas. Përfaqësuesit e kompanive ndanë përvojat e tyre mbi mjedisin e investimeve në Shqipëri, duke vlerësuar potencialin e lartë që ofron vendi, por edhe duke theksuar nevojën për përmirësimin e disa aspekteve që lidhen me procedurat administrative dhe garantimin e kuadrit ligjor.
Drejtoresha Ekzekutive e AIDA, znj. Laura Saro, theksoi rëndësinë e dialogut të drejtpërdrejtë mes bizneseve dhe institucioneve, si dhe angazhimin e AIDA për të adresuar në mënyrë efektive problematikat e evidentuara tek institucionet përgjegjëse.
Ky takim konfirmon vullnetin e përbashkët për të forcuar bashkëpunimin ekonomik mes Shqipërisë dhe Mbretërisë së Bashkuar.
