Match-Maker Albania 2: Shqipëria në fokusin e investitorëve

Dje, Tirana u shndërrua në një forum strategjik investimesh me MatchMaker Albania 2026, duke mbledhur:

mbi 1,200 pjesëmarrës,

rreth 500 investitorë ndërkombëtarë,

8 agjenci investimesh dhe

mbi 400 takime B2B.

Eventi krijoi një hapësirë ku vizioni dhe mundësia u takuan, ku ide të reja u kthyen në projekte dhe bashkëpunimi ndërkombëtar u reflektua në rezultate afatgjata.

Në ceremoninë e hapjes morën pjesë përfaqësues të lartë të shtetit dhe institucioneve, të cilët ndanë vizionin e tyre për zhvillimin ekonomik të vendit.

Drejtoresha Ekzekutive e AIDA-s, znj. Laura Saro, nënvizoi se qëllimi i agjencisë sonë është të funksionojë si një “one-stop-shop” për investitorët, duke ofruar një hapësirë të besueshme për t’u lidhur me partnerë privatë dhe institucione shtetërore.

Në fjalët e tyre, Ministri i Infrastrukturës dhe Energjisë, z. Enea Karakaci, theksoi potencialin e Shqipërisë në sektorin e energjisë. Ministrja e Ekonomisë dhe Inovacionit, znj. Delina Ibrahimaj, vuri në dukje rolin e reformave dhe inovacionit në rritjen ekonomike; ndërsa Ministri i Turizmit, Kulturës dhe Sportit, z. Blendi Gonxhja, theksoi zhvillimin e turizmit cilësor dhe të qëndrueshëm si një sektor kyç për tërheqjen e investimeve.

Kryeministri, z. Edi Rama, u ndal te progresi i vendit dhe rritja e besimit të investitorëve ndërkombëtarë.

Gjatë ditës u prezantuan projekte shtetërore dhe private, duke ofruar transparencë dhe mundësi të qarta për të gjithë aktorët e interesuar. Pjesëmarrja e institucioneve dhe e kompanive globale si World Bank, IFC, Forbes Global Properties, Minor Hotels Group, Enhol Company, Lidl, Catwell dhe të tjera, i dha eventit një dimension ndërkombëtar, duke konfirmuar Shqipërinë si një destinacion serioz për investime strategjike.

MatchMaker Albania 2026 nuk ishte thjesht një event biznesi – ishte një platformë që forcon pozicionin e Shqipërisë në hartën globale të investimeve, duke krijuar hapësira për partneritete afatgjata dhe zhvillim të qëndrueshëm.