Zona Future Estate, në kuadër të Match Maker Albania 2, u shndërrua në një nga hapësirat dinamike të eventit

Në këtë zonë u prezantuan 20 projekte konkrete – 15 private dhe 5 shtetërore – duke ofruar një pasqyrë të qartë të transformimit urban dhe turistik që po merr formë në Shqipëri.

Prania e studiove të njohura arkitekturore si Bofill Taller de Arquitectura (Spanjë), A Is For Architecture (Mbretëria e Bashkuar), Adoras (Spanjë) dhe MAB Architecture Studio (Itali) i dha zonës një dimension të fortë ndërkombëtar, të reflektuar edhe në prezantimet e tyre gjatë aktivitetit.

Interesi i investitorëve ishte konkret dhe i prekshëm. Aura Sanctuaries nga Gjermania prezantoi një projekt me vlerë 7 milionë euro, ndërsa brandi prestigjioz Swissôtel u prezantua për herë të parë në Shqipëri, me plane të qarta për hapjen e një hoteli – një tregues i vazhdimësisë së hyrjes së markave ndërkombëtare në tregun vendas.

Gjithashtu, Zëvendës Presidenti për Zhvillimin Global i Minor Hotels Group – një rrjet me mbi 560 hotele në mbarë botën – prezantoi interesin e kompanisë për zgjerim në Shqipëri.

Një tjetër emër i rëndësishëm ishte Marcus Benussi, Managing Director i Forbes Global Properties, i cili solli një perspektivë të vlefshme mbi tregun global të pasurive të paluajtshme dhe potencialin në rritje të Shqipërisë.

Të pranishme ishin edhe institucionet kryesore shtetërore – Ministria e Turizmit, Kulturës dhe Sportit, Agjencia e Zhvillimit të Territorit dhe Korporata e Investimeve Shqiptare – duke theksuar rëndësinë strategjike të bashkëpunimit publik-privat në zhvillimin e projekteve të mëdha.

Zona Future Estate konfirmoi se Shqipëria po konsolidohet gjithnjë e më shumë si një destinacion i besueshëm për investime në turizëm dhe pasuri të paluajtshme, duke krijuar lidhje konkrete mes ideve, kapitalit dhe zhvillimit të qëndrueshëm.