AIDA mirëpret përfaqësues të kompanive turke Turqualis dhe Yöruk Holding

Përfaqësues të lartë të kompanive turke Turqualis dhe Yöruk Holding, të njohura për aktivitetin e tyre në sektorin e ndërtimit dhe infrastrukturës civile, u pritën në një takim zyrtar nga stafi i Agjencisë Shqiptare të Zhvillimit të Investimeve (AIDA).

Gjatë takimit, përfaqësuesit e kompanive shprehën interesin e tyre për të investuar në Shqipëri, duke vlerësuar pozicionin strategjik të vendit, mundësitë që vendi ofron në sektorin e turizmit dhe infrastrukturës, si dhe klimën gjithnjë e më të favorshme për investitorët e huaj.

AIDA prezantoi projektet në zhvillim dhe mundësitë konkrete për investime afatgjata dhe të qëndrueshme, duke theksuar angazhimin institucional për të ofruar mbështetje të plotë përgjatë gjithë ciklit investues, si dhe lehtësitë dhe incentivat që Shqipëria ofron për investitorët e huaj.

Ky takim dëshmon edhe një herë se Shqipëria po konsolidohet përherë e më shumë si një pikë referimi për investitorët që kërkojnë zhvillim të qëndrueshëm dhe partneritet afatgjatë.