Drejtori Ekzekutiv i AIDA-s, Znj. Laura Plaku (Saro) mirëpriti në një takim Ambasadorin e Japonisë në Tiranë, SH.T.Z. Takada Mitsuyuki.

Ditën e sotme, Drejtori Ekzekutiv i AIDA-s, Znj. Laura Plaku (Saro) mirëpriti në një takim Ambasadorin e Japonisë në Tiranë, SH.T.Z. Takada Mitsuyuki. Takimi u zhvillua në kuadër të intensifikimit të bashkëpunimit mes dy palëve.

Gjatë takimit, përfaqësuesit ndanë pikëpamjet e tyre lidhur me prezencën aktuale të bizneseve japoneze në vendin tonë, duke u ndalur tek faktorët që përcaktojnë zhvillimin e tyre. Diskutimi u përqëndrua tek masat që duhet të ndërmerren për të rritur prezencën e bizneseve japoneze në Shqipëri.

Znj. Plaku shprehu gatishmërinë maksimale nga ana e AIDA për të mbështetur investimet japoneze në Shqipëri, ndërsa Ambasadori Takada theksoi nevojat e bizneseve japoneze.

Në përfundim të takimit, palët dakordësuan që në vijim, AIDA do të paraqesë nevojën për punësim që kanë bizneset japoneze në Shqipëri, përmes kanaleve të saj të komunikimit.