Shqipëria përmbyll me sukses pjesëmarrjen në ProWine Shanghai 2026!

🇦🇱🇨🇳 Shqipëria përmbyll me sukses pjesëmarrjen në ProWine Shanghai 2026! 🍷
Agjencia Shqiptare e Zhvillimit të Investimeve (AIDA) organizoi me sukses Pavionin Kombëtar Shqiptar në ProWine Shanghai 2026, zhvilluar më 10–12 nëntor në Shanghai, Kinë.
Në këtë edicion, Shqipëria u përfaqësua nga 6 kantina shqiptare: Arbëri, Arianiti, Belba, Caco, Enofama dhe Kantina Familjare Shehi, të cilat prezantuan cilësinë, traditën dhe potencialin eksportues të verërave shqiptare.
👥 Qindra vizitorë patën mundësinë të degustonin verërat shqiptare, ndërsa gjatë tri ditëve të panairit u realizuan rreth 120 kontakte biznesi, nga të cilat 37 u identifikuan nga kantinat pjesëmarrëse si kontakte potenciale për marrëveshje eksporti. Këto rezultate krijojnë perspektiva të reja bashkëpunimi dhe zgjerimi në tregjet ndërkombëtare, veçanërisht në Kinë dhe tregje të tjera aziatike.
🤝 Pavioni Shqiptar u nderua nga vizita e Ambasadorit të Republikës së Shqipërisë në Kinë, Sh.T. z. Riza Poda, si dhe e z. Frank Schindler, CEO i ProWine Düsseldorf.
Pjesëmarrja në këtë panair shënon një tjetër hap të rëndësishëm drejt promovimit të verërave shqiptare dhe forcimit të pranisë së produkteve “Made in Albania” në tregjet globale.
AIDA vijon angazhimin e saj në mbështetje të bizneseve shqiptare, nxitjen e eksporteve dhe promovimin e produkteve vendase në tregjet ndërkombëtare.
BACK TO NEWS