28 Shtator | Dita Ndërkombëtare e së Drejtës për Informim

“Ti ke të drejtë të informohesh, ne kemi detyrim të përgjigjemi”

Në kuadër të 28 Shtatorit, Ditës Ndërkombëtare të së Drejtës për Informim, Zyra e Komisionerit për të Drejtën e Informimit dhe Mbrojtjen e të Dhënave Personale sjell një mesazh ndërgjegjësues për rëndësinë e transparencës dhe aksesit në informacionin publik.

E drejta për informim është një e drejtë e qytetarëve dhe një përgjegjësi për autoritetet publike. Përmes informacionit publik forcohen transparenca, llogaridhënia dhe pjesëmarrja e qytetarëve në jetën publike.

Materiali i përgatitur nga Zyra e Komisionerit përcjell një udhëzim të thjeshtë për ushtrimin e kësaj të drejte:

1. Plotëso formularin e kërkesës.

2. Dërgoje te autoriteti publik.

3. Merr përgjigje brenda afateve ligjore.

E drejta për informim garantohet nga Ligji nr. 119/2014 “Për të drejtën e informimit”, i ndryshuar, me parimet e informimit, transparencës dhe llogaridhënies në qendër.