AIDA çel fushatën e takimeve “Door-to-Door” për investitorët e huaj në Shqipëri

Agjencia Shqiptare e Zhvillimit të Investimeve (AIDA) ju informon se gjatë muajit qershor do të nisë fushatën e takimeve “Door-to-Door”, në kuadër të shërbimeve After-Care për investitorët e huaj që operojnë në Shqipëri.

Kjo nismë do të zhvillohet në bashkëpunim me Ministrinë e Ekonomisë dhe Inovacionit, Ministrinë e Shtetit për Pushtetin Vendor, si dhe me mbështetjen e ambasadave të Gjermanisë, Zvicrës, Holandës, Austrisë, Italisë dhe Hungarisë. Kjo nismë shërben për të forcuar koordinimin institucional dhe dialogun e drejtpërdrejtë me komunitetin e biznesit.

Përmes këtyre takimeve, AIDA synon të jetë më pranë kompanive gjermane, zvicerane, holandeze, austriake, italiane dhe hungareze që operojnë në vend, për të identifikuar nevojat, sfidat dhe mundësitë e tyre për zhvillim të mëtejshëm.

 Takimet do të fokusohen në:

Proceset administrative

Infrastrukturë

Burimet njerëzore të kualifikuara

Planet për zgjerim

Mundësitë për ri-investime dhe rritje të qëndrueshme

Përmes kësaj qasjeje, AIDA synon të forcojë një mekanizëm më efikas komunikimi ndërmjet investitorëve, institucioneve publike dhe njësive të vetëqeverisjes vendore, duke kontribuar në përmirësimin e klimës së investimeve dhe mbështetjen proaktive të investitorëve ekzistues.

 Invest in Albania. Grow with Albania.